Mail from people

Jinghpaw Wunpawng Sha Ni A NGA SA LAILEN HTE SUT MASA

Daw 1 :

1977 ning ten na Ramma ni hte Kanu Kawa ni grai nan ram lai wa masai. Labau hpe nhtang sumru yu yang 1947-1957-1967-1977 ning ten laman hta mungkan ting hpung tang kashaw hkra mying gumhkawng ai Jinghpaw Wunpawng sha ni rai ga ai law. Myen Mung hpe makawp maga ai hpyen hpung hta gasat gala ai mying gumhkawng ai . Bum Du ni gasat gala mying gumhkawng ai, mungkan hta lagat chyang ai, Asuya magam dap kaw mu gun kangka ai, shagrau dazik ni lu ai hte mying grai gumhkawng lai wa saga ai. Dai ten na Nu Wa ni a sut masa gaw hkai lu hkai sha, Asuya mu galaw, byin-sin hpe shareng sha, lamu ga kaja ai de n-gaw htawt re ten ladaw ni re. Yawng gaw myit madang sha nrai, mungkan hta pyi mying kaja gumhkawng lai wa saga ai.

Daw 2 :

Anhte hpe makam masham hta lam woi ai Sara Kaba ni woi awn ai hte, 1977 ning ( 100 ) ning Jaw Masat chyeju shakawn wunli kyu hpyi da ya ai marang, ya chyawm gaw galu kaba ai amyu, mayam nrai madu she rai manit dai, nga ai hte maren, 20 ning daram hpun sau lauban, ja lauban, lung seng lauban. Dai ni na aten hta hpun lauban nga nna, masha ni shadut dut ai gaw, mari chyu jai sha ayai ai a prat ladaw langai mi nga lai wa sai. Dai prat Disco prat nga nna, kajai gumhkawng lai wa sai. Dai ( 20 ) ning daram na Jinghpaw ni a nga sa lailen hte sut masa gaw, nsin nhtoi nchye ginhka, gumhpraw a majaw, mana bu nga ai ten ladaw mi rai lai mat wa sai.

Daw 3 :

1997 ning kaw nna 2007 ning du hkra gaw, pawng sha dut sha re aten ladaw rai wa sai. Lu da ai sut gan mung ma wa sai. Mungdaw mungdan sutgan mung htum ma wa sai. Kashu Kasha ni mung htenza ma wa sai, si htum ma wa sai. Lup wa de asak kaji ai ni, Ramma ni, ( 45 ) ning a npu de na ni grai law mat wa sai hpe mu mada lu ai. Myit sawn chye ai Kanu Kawa ni hte, byin mai ai Kanu Kawa ni, kashu kasha ni hten za mat na mung hkrit ai, si htum mat na mung tsang ai majaw, nanghpam loi mi hkyam sa ai myu ga, layang ga, maigan ga de woi rawt sai. Nkau mi sadi nga ninglen, myu nbung ai jahtawng nhtu ai, maigan num / la la hkrup sai. Amyu hpe tsaw ra ai ni a matu hpung hpe tsawra ai ni a matu kabu hpa gaw yawn hpa zawn byin tai wa sai.

Ramma ni Myit yu na lam

Lai wa sai ten na anhte a kabu hpa gaw, hpa majaw yawn hpa de gale wa a ta ? Anhte a hpu shawng hpu ba, Kanu Kawa ni a nga sa lailen hte sut masa ladat hpe bai nhtang sagawn sumru yu yang, makam masham lam hta ningra mat ai hpe maram mu chye lu ai. Karai Kasang jaw ai sut gan hpe tsa dan hte jawm jai kau ai. Karai hpe chyeju nchye htang ai. Karai Kasang a Chyoi Pra ai Wenyi lam woi ai de nyawng ai, Tsadan ra ai lam de chyu shanang ai. Dai majaw nlu sha na lu sha ai, mu na nmu ai nmu na mu ai, galaw na ngalaw ai, ngalaw na galaw ai. Ja gumhpraw a majaw galu kaba wa ai ni nga ai zawn, law malawng gaw bai hkrat sum mat nga ga ai law.

Hpa majaw bai hkrat sum mat ai hpe sawn sumru yu yang, anhte a hpaga ladat gaw, U Hpaga Ladat, she rai nga a hka ! Langai lu tam jang yawng jawm sha kau ai, yak jang nam de shang mat wa , lu jang bai pru wa re sut masa lam rai nga ga ai. Masing n nga ai hpe maram chye lu ai, majoi lu majoi jaw, majoi hpyi majoi lu, karum hkat ai ngu yang shada jahten ai lam she tai wa sai. Ramma ni bungli n kam galaw sai, ningbaw kaja n lu sai. Anhte Jinghpaw Wunpawng sha ni a shawng lam hpa baw wa chye ai ngu ai hpe shawng lam shingran chye mu ai Ramma ni tai wa ga ngu mayu ai.

Dai ni na Ramma hte Sut Masing

Sut masing ngu ai gaw, du na ten na mungdan masa, ginra masa, sut masa, hpa byin wa chye ai ngu ai hpe tau hkrau nna masing jahkrat, sut hpaga ladat shaw, tau hkrau hkyen lajang ai hpe ngu ai re.

• Mung Masa

• Sut Masa

• Ginra Masa lam ni du wa na ( 5 ) ning, ( 10 ) ning hta hpa byin wa chye ai hpe maram tau hkrau chye ra ai.

Nang Ramma wa yup pyaw nga ai ten ndum shami nga nga ai ten, ahkying aten hte nhtoi ni gaw a gatsi sha nga lai mat wa nga ai. Aten matsan, sutgan lusu, aten matsan hpaji lusu nga ma ai. Aten lusu ai wa gaw hpa mung matsan ai. Sut lu nga mai lam hta ahkyak ai lam ni ;

• Makam masham

• Byin wa chye ai hpe tau hkrau ai lam

• Jai gumhpraw hte shang gumhpraw bung ai, nbung ai

• Bungli hpe graph soi ra ai

• Madu dum nta masha, manaw manang hte shawng lam sut masing shingran bawngban chye ra ai.

Ramma ni a matu nsin chyip nga ai ten re. Nhtoi htoi wa yang, nang galaw na shajin da sai kun ?

Hpa myit da sai kun ? Lu nnga, Chye ni nngai ngu nna mung hkum gadap, Nang hpe htep htep hkrat sum shangun Tsadan wa hkan nang nga ai ! Matsan nngai, n-chye nngai ngu nna mung hkum hkrap ! Hkum hkrit, Yehowa nga nga ai.

N-gun La Na Ga Ni

1.Karai Kasang hpe kam sham lu nga ai gaw, Mungkan hpe madu lu ai hta grau nga ai.

2.Sut su ai hte hpaji chye ai gaw, mungdan daw chyen mi hpe up hkang ai wa mung tai nga ai.

3. Lawu ga madu ai wa gaw, mungdan daw chyen madu ai hte bung ai.

4. Maigan mungdan kaw sak prat agut gu hkra sa nga mat ai wa gaw, labau hpe lup makoi kau ai wa re.

5. Htung hking gaw Wunpawng sha ni yawng a matu kaja dik ai raitim, tsa charu hpe gaw htunghking lu sha hku n-mai hkap la ai. Htunghking lu sha mung nre ai.

6. Mungkan ntsa nga pra ten hta ahkyak htum ai gaw labau re.

7. Ningbaw kaja ngu ai gaw lam shagu hta kaja htum ai wa rai nna, jaw ai hpe gwi gwi daw dan ai wa rai ra ai. Mungdan a ningbaw , Mungkan a ningbaw, Hpung a ningbaw, A Myu sha ningbaw ni law law byin tai wa manu ga law.

Hkum tsup wa nu ga.

Sut Du Dawshi Yaw Ba

( Htoi Gintawng )

This post was written by: Franklin Manuel

Franklin Manuel is a professional blogger, web designer and front end web developer. Follow him on Twitter