Tuesday, January 3, 2012
CHYING HKAI NU
Do you like this story?
Tsit lali tsawm htap dik ai, shagawng bum ring bum ga, tsit tsawm hpun kawa hpun sau tsi hkrung tsinan, hka shi hkanu lwi,ntsa malen pyen u, dusat dumyang, ja lungseng gumhpraw, nhprang rai hkum hkum nga panyep panyep ai ntsa, myu tsaw, mung tsaw, shawang myit gawp ai, atsam marai rawng ai, sari sadang hpring ai Nu a myu tsaw hkri tung saitum saipa kaw na myu tsaw sai hkaw ya ai hte, sak hpe galai nna,mungkan n'htoi de, labau shang shangai chyinghkai shaprat ya ai Nu e, chying hkai Nu e. Galoi shaga dat tim nye myit masin hta n'gun lu ai Nu.... annau ni naw kaji ai ten myu hte mungdan a matu Sai hkaw ya let share shagang ai hte awmdawm shanglawt a matu Si hkam ya ai arang bang lai wa sai, myu tsaw mung tsaw labau sai matut kau da ya ai Wa-- Wa n'ngut kau da ai yi ngam hpe matut shakre na, shanghlawt myit, myu tsaw myit, magam myit, madu myit, shawa myit Sai sam bang kau da ya ai Wa .. Wa E
Wa kau da ai annau ni hpe Mashi marung she gayaw, lata lahpaw she hpaw, salu salat hte puba jamjau ai yawng hpe hkam sharang shalai let, annau ni hpe masha zawn byin hkra, masha hte bung hkra bau maka ai zilum ai Nu.... mangai hkra u ni hte maling hkrudu ni ngoi, nampu nampan ni a sama, mangai nwat bat hte mangai yi wa de htoilen sumpyi, mahkawn shabrang ni a nchyun shangawn nsen hkra, pyaw pyaw la ai mangai ta kalang bai du nga sai Nu e,
Nlung ningnan sha, chyeju dum poi galaw nga ai dai shani shaning tup shakut la lu ai nsi naisi sihtu simai ngashan, shalap gapung shan hkak nga ga i, hkum hkum shadu shajin tawn, manyi sum sai ai myiman hkrai, ma kaji ni a n sen hkrai malap nmai ai, chyingbau shupsheng wp sumpyi dum, buga mahkawn hkawn let lahkrip ra ra htawng ka ka, pyaw dik ai ten, anhte a htawng seng mangai ta. A kajawng sha mare baw de myen du sai.. myen du sai nga marawn kade nna yang nta nat ai hte sinat n'sen nhkring nsa ngoi, Ma Brang yan Ma Hkawn nang de nangde nga Nu a shaga nhtum shi yang aka aka, Nu hkawm nga ai kaw na kadawng mat, Nu makau ngai kagat du wa yang Nu a sinda pai maga de sai grai pyu nga ai Nu.. Nu hpa byin ata? Annau myit kaji
na tsang sam ai Nu.. ngai Nu hpe mau kahpra let a hpum ai Nu grai sharang let Ma yan e Brang Hkum hkum hkrap lu, myi prwi si hkum pru lu, shanglawt mungdan sha nlu dingsa hkum hkrap, myi prwi si hkum pru, nga yet sha tsun let Nu ga nshaga mat sai, Nu ngai ahpum tawn ai kaw kya gumba ai hte yup pyaw mat sai Nu,, Nu.. Nu a sai nye sinda kaw hkaw bun sai, annau ni a matu Sai hkaw let myu tsaw myit bang ya ai, myu hte mungdan a matu arang bang lai wa ya sai, Nu yen Wa e ..
Ya dai ni htawng seng mangai, nmut mangai bai du nga sai, Moi 20 ning jan Nu jaw kau da ai hkam sharang nlu, malap nmai ai Nu yan Wa a yi ngam hpe dai ni shakre na matu Nu shani shana ten shagu tsun ai awmdawm shanglawt lu hkra Ma e shakut ra ai yaw nga, ya myu tsaw hpyen la tai, Nu myit mada dik ai, myu sha yawng a Padang Hkrun Lam Majan hta Ma tatut shang gasat lawm lu ai majaw, arang kaba bang lai wa sai, Nu yan Wa a ga sadi dung ai hpe shadik shatup nga nngai Nu... Nu dai ni myen ni moi na hta grau zingri ai, grau maka nkap ai, grau nshap ai, roi rip ai lam mung htum sai, mare kahtawng yawng nat ai, mu mamu mare masha yawng gap sat ai, mu mamu yawng la ai, mare buga yawng shingran katsi mat sai, U goi ai pyi nna mat sai, mangai nwat hte rau mam ni myin chyawng nga sai, dan la nmai dan na masha nnga Myu shamyit ai myu shakre ai sawa myen ni, kraw salum hta hka chyat hkra, n'gut ai Nu.e. Ladi nchyun ni hkri ai tim ma nhkrap ai Nu.. masin salum hpawm hkra sinda chyat hkra machyi rai tim ma myi prwi si npraw ai yaw Nu, chying hkai Nu e...
Asak hte ruyak jamjau hkiba ai yawng hpe arang bang let Padang sha ndip la lu dingsa Nu a num htet ga sha, nlu shadik shatup dingsa myu hte mungdan a matu gasat na, galoi asum njaw ai, galoi nhkrit ai, lamu ga hte Myu sha yawng madai ai, tim Ma galoi nhkrap ai, masin ni hpawm kaprep ai, sinda ni chyat machyi ai tim Ma galoi nhkrap Na Nu.. Nu e.
Padang dip la lu ai shani she Nu yan Wa hte myu hte mungdan yawng a matu arang da amyet da tsam mi alu n'gun mi alu hkrap na yaw.
Shanglawt sha nlu dingsa dating gasat na NU.. chying hkrai Nu e... Nu tsaw ra ai htawng seng mangai ta.
Baren Numraw
This post was written by: Franklin Manuel
Franklin Manuel is a professional blogger, web designer and front end web developer. Follow him on Twitter
Subscribe to:
Post Comments (Atom)
0 Responses to “CHYING HKAI NU”
Post a Comment